“Ang Diyos ng lahat ng biyaya, ang siyang tumawag sa inyo sa kaniyang walang hanggang kaluwalhatian kay Cristo Jesus. Pagkatapos ninyong maghirap ng maikling panahon, siya rin ang magpapaging-ganap, magpapalakas, magbibigay ng kakayanan at magpapatatag sa inyo.” (1 Pedro 5:10, Ang Salita ng Diyos)
Minsan sa gitna ng mga paghihirap at sa ordinaryong mga stress ng pang araw-araw na buhay, maaari tayong mapahinagpis, “Hanggang kailan, O Panginoon! Puro pasakit ang nakikita ko ngayon. Ano naghihintay sa akin bukas? Nandiyan ka pa rin ba sa paghihirap kong ito?”
Ang tanong na ito ay lubos na mahalaga, dahil sinabi ni Jesus, “Subalit siya na magtitiis hanggang wakas ay maliligtas.” (Marcos 13:13, Ang Salita ng Diyos). Nanginginig tayo sa pag-iisip na kasama tayo sa “sa mga tumatalikod at napapahamak” (Hebreo 10:39, Magandang Balita Biblia). Hindi ito biro. Ang pagdurusa ay isang kakila-kilabot na banta sa pananampalataya sa Diyos at sa Kanyang biyayang panghinaharap (future grace).
Kaya napakagandang marinig ang pangako ni Pedro sa mga naghihirap at pagod na Kristiyano, ” Ang Diyos ng lahat ng biyaya, ang siyang tumawag sa inyo sa kaniyang walang hanggang kaluwalhatian kay Cristo Jesus. Pagkatapos ninyong maghirap ng maikling panahon, siya rin ang magpapaging-ganap, magpapalakas, magbibigay ng kakayanan at magpapatatag sa inyo. (1 Pedro 5:10, Ang Salita ng Diyos).”
Ang katiyakan na hindi siya mag-aatubili nang higit pa sa ating makakayanan, at aalisin niya ang mga kapintasan na ating idinadaing, at patitibayin niya magpakailanman ang wari na babaksak— ang katiyakang iyon ay nagmumula sa Diyos ng “lahat ng biyaya.”
Ang Diyos ay hindi Diyos ng iilang biyaya–katulad ng mga lumipas na biyaya . Siya ang “Diyos ng lahat ng biyaya” — kabilang na ang walang-hanggan at hindi mauubos na mga imbakan ng biyayang panghinaharap na kailangan natin para magtiis hanggang wakas.
Ang pananampalataya sa biyayang panghinaharap, na pinalakas ng alaala ng nakaraang biyaya, ang susi sa pagtitiis sa makipot at mahirap na daan patungo sa buhay.
This article was translated by Nitoy Gonzales and was originally written by John Piper of Desiring God. To read the original version, click https://www.desiringgod.org/articles/only-a-little-while
